دعا الإعلامي عمرو أديب المواطنين إلى التحلي بثقافة الترشيد خاصة في ظل الظروف الاقتصادية التي يمر بها العالم بعد الحرب الروسية الأوكرانية، ناصحًا المصريين بضرورة الحفاظ على أموالهم في ظل أجواء الحرب.

وقال عمرو أديب في برنامجه «الحكاية» على قناة «إم بي سي مصر»: «الدولة متكفلة بالمواطن اللي بياخد التموين، ده حاجة مفيهاش كلام. أنا بتكلم عن صانع السوق والقوة الشرائية، أنا النهارده مش شاري من المكان ده بالسعر ده».

وأضاف: «الأسعار زادت في مصر والعالم وكل مكان في الدول الغنية والفقيرة والاشتراكية والرأسمالية. الفواتير زادت المياه والكهرباء والغاز. من بعد العيد عندنا زيادة في منتجات الألبان من 10-15% وجايز تزيد مرة أخرى. إنت عايش في عصر الحرب، ولازم إنت وعيلتك وناسك تقولوا لأ مش هنشتري الحاجة دي بالطريقة دي تاني».

تابع: «هي مش قضية معاك فلوس أو لأ، هي قضية التدبير. أول ما بكرة يبقى غامض امسك في فلوسك. رئيس الوزراء البريطاني بوريس جونسون من يومين طلع قال: آسف في ناس مش هنعرف نعملها حاجة. وابتدينا نتكلم بثقافة الحرب فعلا. إنت في مصر هنا ثقافتك مختلفة».

واصل: «هنا ده مش أسلوبك، إنت هناك أسلوبك مسؤول مسؤولية تامة كاملة عظيمة عن كل البشر، ولكن هنا تقوله في حرب ويقولك أنا مالي. يجب أن يكون لدينا ثقافة الأزمة».

اختتم وفقا لما ورد في المصري اليوم هنا: «بقابل ناس من مختلف الطبقات، الجميع بشكل عام يفكر ويقول هيعمل إيه، آسف أن أحاول أقنعك تاخذ بالك على فلوسك. أنا مش بمهد التمهيد ده لحاجة هتحصل، أنا بتكلم على حاجة حصلت».